ਐਨ ਸੀ ਸੀ ਦੇ ਆਲ ਇੰਡੀਆ ਟਰੈਕਿੰਗ ਕੈਂਪ ਉਤਰਾਖੰਡ ਵਿੱਚ ਪੰਜਾਬ, ਹਰਿਆਣਾ, ਹਿਮਾਚਲ ਅਤੇ ਚੰਡੀਗੜ੍ਹ ਡਾਇਰੈਕਟਰੇਟ ਨੇ ਤੀਜਾ ਸਥਾਨ ਪ੍ਰਾਪਤ ਕੀਤਾ
ਆਲ ਇੰਡੀਆ ਟਰੈਕਿੰਗ ਕੈਂਪ ਉਤਰਾਖੰਡ ਵਿੱਚ ਪੰਜਾਬ, ਹਰਿਆਣਾ, ਹਿਮਾਚਲ ਅਤੇ ਚੰਡੀਗੜ੍ਹ ਡਾਇਰੈਕਟਰੇਟ ਦੀ ਅਗਵਾਈ ਫ਼ਸਟ ਪੰਜਾਬ ਨੇਵਲ ਯੂਨਿਟ ਨਵਾਂ ਨੰਗਲ ਦੇ ਸੁਖਸਾਲ ਸਕੂਲ ਦੇ ਐਨ ਸੀ ਸੀ ਅਫ਼ਸਰ ਸੋਹਨ ਸਿੰਘ ਚਾਹਲ ਦੁਆਰਾ ਕੀਤੀ ਗਈ। ਜਾਣਕਾਰੀ ਦਿੰਦਿਆਂ ਐਨ ਸੀ ਸੀ ਅਫ਼ਸਰ ਸੋਹਨ ਸਿੰਘ ਚਾਹਲ ਨੇ ਕਿਹਾ ਕਿ ਇਸ ਕੈਂਪ ਵਿੱਚ ਜੰਮੂ ਅਤੇ ਕਸ਼ਮੀਰ, ਉੱਤਰਖੰਡ, ਬਿਹਾਰ ਅਤੇ ਝਾਰਖੰਡ, ਉੱਤਰਪ੍ਰਦੇਸ਼ ਅਤੇ ਪੰਜਾਬ ਦੇ 510 ਐਨ ਸੀ ਸੀ ਕੈਡਿਟਾਂ ਨੇ ਭਾਗ ਲਿਆ। ਪੰਜਾਬ ਤੋਂ ਪਟਿਆਲਾ ਅਤੇ ਜਲੰਧਰ ਗਰੁੱਪ ਦੇ 102 ਐਨ ਸੀ ਸੀ ਕੈਡਿਟਾਂ ਨੇ ਭਾਗ ਲਿਆ। ਉਹਨਾਂ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਉੱਤਰਾਖੰਡ ਟ੍ਰੈਕ 25 ਜੂਨ ਤੋਂ 02 ਜੁਲਾਈ 2024 ਤੋਂ ਕੁਮਾਉਂ ਖੇਤਰ (ਦਵਾਰਾਹਟ, ਅਲਮੋੜਾ ਜ਼ਿਲ੍ਹਾ) ਵਿੱਚ ਆਯੋਜਿਤ ਕੀਤਾ ਗਿਆ, ਜੋਕਿ ਸਮੁੰਦਰੀ ਤੱਲ ਤੋਂ 1510 ਮੀਟਰ ਦੀ ਉਚਾਈ ‘ਤੇ ਪਹਾੜੀਆਂ ਦੇ ਹਰੇ ਭਰੇ ਚਰਾਗਾਹਾਂ ਵਿੱਚ ਸਥਿਤ ਹੈ । ਉਤਰਾਖੰਡ ਵਿਚ ਬਹੁਤ ਸਾਰੇ ਸੈਲਾਨੀ ਨੈਨੀਤਾਲ, ਰਾਨੀਖੇਤ, ਅਲਮੋੜਾ ਅਤੇ ਕੌਸਾਨੀ ਵਰਗੇ ਮਸ਼ਹੂਰ ਪਹਾੜੀ ਸਟੇਸ਼ਨਾਂ ‘ਤੇ ਹਰ ਸਾਲ ਸੈਲਾਨੀ ਵੱਡੀ ਗਿਣਤੀ ਵਿੱਚ ਜਾਂਦੇ ਹਨ ਅਤੇ ਕੁਦਰਤ ਦੀ ਬਖਸ਼ਿਸ਼ ਨੂੰ ਦੇਖ ਕੇ ਹੈਰਾਨ ਹੁੰਦੇ ਹਨ। ਫਿਰ ਵੀ ਇਸ ਖੇਤਰ ਨੂੰ ਇਸਦੀ ਸ਼ਾਨ ਨਾਲ ਜਾਣੂ ਕਰਵਾਉਣ ਦਾ ਸਭ ਤੋਂ ਵਧੀਆ ਤਰੀਕਾ ਹੈ ਟ੍ਰੈਕਿੰਗ। ਉਹਨਾਂ ਕਿਹਾ ਕਿ ਉੱਚੀਆਂ ਪਹਾੜੀਆਂ, ਹਰੀਆਂ ਢਲਾਣਾਂ, ਵਗਦੀਆਂ ਨਦੀਆਂ ਅਤੇ ਪੁਰਾਣੀਆਂ ਝੀਲਾਂ ਦੇ ਖੂਬਸੂਰਤ ਲੈਂਡਸਕੇਪ ਵਾਲਾ ਕੁਮਾਉਂ ਖੇਤਰ, ਉਤਸ਼ਾਹੀ ਟ੍ਰੈਕਰਾਂ ਲਈ ਆਦਰਸ਼ ਸਥਿਤੀਆਂ ਪ੍ਰਦਾਨ ਕਰਦਾ ਹੈ। ਇਸ ਟ੍ਰੇਕ ਦੁਆਰਾ ਕੈਡਿਟਾਂ ਨੂੰ ਸ਼ਾਨਦਾਰ ਚੋਟੀਆਂ ਨੂੰ ਦੇਖਣ ਦਾ ਇੱਕ ਵਿਲੱਖਣ ਮੌਕਾ ਮਿਲਿਆ ਅਤੇ ਉਨ੍ਹਾਂ ਨੂੰ ਕੁਮਾਉਂ ਦੇ ਲੋਕਾਂ ਦੇ ਸੱਭਿਆਚਾਰ, ਪਰੰਪਰਾਵਾਂ, ਰੀਤੀ-ਰਿਵਾਜਾਂ ਅਤੇ ਜੀਵਨ ਸ਼ੈਲੀ ਬਾਰੇ ਪਤਾ ਚੱਲਿਆ। ਉਹਨਾਂ ਕਿਹਾ ਕਿ ਇਸ ਟਰੈਕ ਦਾ ਮੁੱਖ ਮਕਸਦ ਕੈਡਿਟਾਂ ਵਿੱਚ ਸਾਹਸ, ਖੋਜ ਅਤੇ ਵਿਹਾਰਕ ਨੈਵੀਗੇਸ਼ਨ ,ਲੀਡਰਸ਼ਿਪ, ਦੋਸਤੀ, ਭਾਈਚਾਰਕ ਜੀਵਨ ਦੀ ਭਾਵਨਾ, ਅਨੁਸ਼ਾਸਨ ਅਤੇ ਚਰਿੱਤਰ ਨਿਰਮਾਣ ਸਹਿਣਸ਼ੀਲਤਾ, ਸਵੈ-ਵਿਸ਼ਵਾਸ, ਟੀਮ ਭਾਵਨਾ, ਅਤੇ ਐਸਪ੍ਰਿਟ-ਡੀ-ਕੋਰਪਸ ਦੇ ਗੁਣਾਂ ਦੇ ਵਿਕਾਸ ਕਰਨਾ ਹੈ। ਉਹਨਾਂ ਕਿਹਾ ਕਿ ਕੈਂਪ ਦੌਰਾਨ ਹੋਏ ਵੱਖ ਵੱਖ ਤਰ੍ਹਾਂ ਦੇ ਮੁਕਾਬਲਿਆਂ ਵਿੱਚ ਪੰਜਾਬ ਨੇ ਤੀਜਾ ਸਥਾਨ ਪ੍ਰਾਪਤ ਕੀਤਾ। ਇਸ ਮੌਕੇ ਤੇ ਉਹਨਾਂ ਨਾਲ ਜਲੰਧਰ ਗਰੁੱਪ ਦੇ ਐਨਸੀਸੀ ਅਫਸਰ ਕਰਨ ਭੱਲਾ ਅਤੇ ਪਵਨ ਕੁਮਾਰ ਹਾਜ਼ਰ ਸਨ।
Punjab, Haryana, Himachal and Chandigarh directorates secured third place in NCC All India Trekking Camp Uttarakhand.
