Rupnagar District Level Review Meeting Successfully Organized

ਰੂਪਨਗਰ, 26 ਨਵੰਬਰ — ਜ਼ਿਲ੍ਹਾ ਪੱਧਰ ਦੀ ਮਹੱਤਵਪੂਰਨ ਸਮੀਖਿਆ ਮੀਟਿੰਗ ਅੱਜ ਸਫਲਤਾਪੂਰਵਕ ਆਯੋਜਿਤ ਕੀਤੀ ਗਈ, ਜਿਸ ਦੀ ਅਗਵਾਈ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਸੈਕੰਡਰੀ ਸ਼੍ਰੀ ਪ੍ਰੇਮ ਕੁਮਾਰ ਮਿੱਤਲ, ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਪ੍ਰਾਇਮਰੀ ਸ. ਸ਼ਮਸ਼ੇਰ ਸਿੰਘ ਅਤੇ ਡਾਇਟ ਪ੍ਰਿੰਸੀਪਲ ਸ਼੍ਰੀਮਤੀ ਮੋਨੀਕਾ ਭੂਟਾਨੀ ਨੇ ਕੀਤੀ। ਮੀਟਿੰਗ ਵਿੱਚ ਪ੍ਰਾਇਮਰੀ ਅਤੇ ਅੱਪਰ ਪ੍ਰਾਇਮਰੀ ਵਿੰਗ ਦੇ ਜ਼ਿਲ੍ਹਾ ਰੀਸੋਰਸ ਕੋਆਰਡੀਨਟਰ ਵਿਪਿਨ ਕਟਾਰੀਆ, ਲਖਵੀਰ ਸਿੰਘ ਅਤੇ ਸਮੂਹ ਬੀ.ਆਰ.ਸੀ. ਕੋਆਰਡੀਨੇਟਰ ਹਾਜ਼ਰ ਰਹੇ।

ਮੀਟਿੰਗ ਦੌਰਾਨ ਕਲੱਸਟਰ ਐਨਰਿਚਮੈਂਟ ਪ੍ਰੋਗਰਾਮ (CEP) ਦੀ ਪ੍ਰਗਤੀ, ਅਧਿਆਪਕ ਟ੍ਰੇਨਿੰਗ ਸਥਿਤੀ, ਅੰਗਰੇਜ਼ੀ ਕਰੀਕੂਲਮ ਦੇ ਲਾਗੂ ਕਰਨ ਅਤੇ ਯੁੱਧ ਨਸ਼ੇ ਵਿਰੁੱਧ ਕਰੀਕੂਲਮ ਦੀ ਕਾਰਗੁਜ਼ਾਰੀ ਬਾਰੇ ਵਿਸਤ੍ਰਿਤ ਸਮੀਖਿਆ ਕੀਤੀ ਗਈ। ਇਸ ਤੋਂ ਇਲਾਵਾ, ਅਕੈਡਮਿਕ ਸਪੋਰਟ ਗਰੁੱਪ ਅਬਜ਼ਰਵੇਸ਼ਨ ਸਥਿਤੀ ਅਤੇ ਮਿਸ਼ਨ ਸਮਰਥ ਤੇ ਇੰਡਿਪੈਂਡੈਂਟ ਅਸੈਸਮੈਂਟ ਵਿਚਕਾਰ ਪਾਏ ਜਾ ਰਹੇ ਮਿਸਮੈਚ ‘ਤੇ ਵੀ ਗਹਿਰਾਈ ਨਾਲ ਚਰਚਾ ਕੀਤੀ ਗਈ।

ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਸੈਕੰਡਰੀ ਸ਼੍ਰੀ ਪ੍ਰੇਮ ਕੁਮਾਰ ਮਿੱਤਲ ਨੇ ਕਿਹਾ ਕਿ, “ਸਕੂਲਾਂ ਵਿੱਚ ਗੁਣਵੱਤਾਪੂਰਣ ਸਿੱਖਿਆ ਨੂੰ ਯਕੀਨੀ ਬਣਾਉਣਾ ਸਾਡੀ ਪਹਿਲੀ ਤਰਜੀਹ ਹੈ। ਪਾਠਕ੍ਰਮ ਦੇ ਪ੍ਰਭਾਵਸ਼ਾਲੀ ਲਾਗੂ ਕਰਨ ਨਾਲ ਨਾਲ ਮੈਦਾਨੀ ਪੱਧਰ ‘ਤੇ ਹੋ ਰਹੇ ਮੁਲਾਂਕਣ ਅਤੇ ਅਸਲ ਨਤੀਜਿਆਂ ਵਿੱਚ ਤਾਲਮੇਲ ਲਿਆਉਣਾ ਬਹੁਤ ਜ਼ਰੂਰੀ ਹੈ।”